Aeroxenerador

Un aeroxenerador ye un xenerador llétricu que funciona convirtiendo la enerxía cinética del vientu en enerxía mecánica al traviés d'una héliz y en enerxía llétrica gracies a un alternador. Los sos precedentes direutos son los molinos de vientu que s'emplegaben pa la molienda y llogru de farina. Nesti casu, la enerxía eólica (en realidá la enerxía cinética del aire en movimientu), apurre enerxía mecánica a un rotor héliz que, al traviés d'un sistema de tresmisión mecánicu, fai xirar el rotor d'un xenerador, de normal un alternador trifásicu, que convierte la enerxía mecánica rotacional en enerxía llétrica.

Esisten distintos tipos d'aeroxeneradores, dependiendo de la so potencia, la disposición de la so exa de rotación, el tipu de xenerador, etc.

Los aeroxeneradores pueden trabayar de manera aisllada o arrexuntaos en parques eólicos o plantes de xeneración eólica, alloñaos unos d'otros, en función del impautu ambiental y de les turbulencias xeneraes pol movimientu de les palas.

P'apurrir enerxía a la rede llétrica, los aeroxeneradores tienen de tar dotaos d'un sistema de sincronización por que la frecuencia de la corriente xenerada calténgase perfeutamente sincronizada cola frecuencia de la rede.

Yá na primer metá del sieglu XX, la xeneración d'enerxía llétrica con rotores eólicos foi abondo popular en cases aisllaes asitiaes en zones rurales.

La enerxía eólica ta volviéndose más popular anguaño, al demostrar la viabilidá industrial, y nació como busca d'una diversificación nel abanicu de xeneración llétrica ante una crecedera de la demanda y una situación xeopolítica cada vez más complicada nel ámbitu de los combustibles tradicionales.