Barockmusik

D Periode vo dr Barockmuusig in dr oobeländische Kunstmuusig wird au as Generalbasszitalter bezäichnet und isch grad noch dr Rönessans choo. Si isch vom Aafang vom 17. bis öbbe zur Middi vom 18. Joorhundert gange. Si zelt hüte zur sogenannte Alte Muusig.

Dr Aafang vom musikalische Barock wird dur d Iifüerig vom Generalbass in de Komposizioone vom Claudio Monteverdi markiert. Es isch e Kennzäiche vo dr Barockmuusig und vo dr Muusig vom Rokoko, wo nochhäär cho isch, ass dr Generalbass immer brucht worde isch. Mä cha dr Barock no witer iidäile, öbbe eso:

• Früebarock (öbbe 1600 bis 1650), wo d Italiäner dominiert häi. Bedütendi Verdräter: Claudio Monteverdi (1567–1643), Heinrich Schütz (1585–1672), Jan Pieterszoon Sweelinck (1562–1621), Girolamo Frescobaldi (1583–1643), Giacomo Carissimi (1605–1674), Johann Heinrich Schmelzer (1623–1680)
• Hoochbarock (öbbe 1650 bis 1710), wo dr Iifluss vo de Franzoose bedütend gsi isch. Bedütendi Verdräter: Jean-Baptiste Lully (1632–1687), Arcangelo Corelli (1653–1713), Dietrich Buxtehude (1637–1707), Henry Purcell (1659-1695)
• Spootbarock (öbbe 1710 bis 1750), wo sich die regionaale Stil enander aagnööcheret häi. Bedütendi Verdräter: Georg Philipp Telemann (1681–1767), Carl Heinrich Graun, Johann Adolph Hasse, Johann Sebastian Bach (1685–1750), Antonio Vivaldi (1678–1741), Georg Friedrich Händel (1685–1759), Pieter Hellendaal.

Vo dr allgemäine Kultur us gsee, isch noch em Barock d Faase vom Rokoko choo; in dr Muusig het sich scho vo de 1730er Joor dr so genannti empfindsami Stil iigrichdet. Hüfig luegt mä dr Johann Sebastian Bach as dr Volländer vom musikalische Barock aa. Nochhäär chunnt in dr Muusiggschicht d Periode vo dr Klassik mit em Haydn und em Mozart.