Bollywood

Bollywood ye l'alies usáu pa la industria cinematográfica n'idioma hindi, allugada en Bombay, Maharastra, India, la ciudá más poblada de la India. El términu ye utilizáu incorreutamente pa referise a tola industria cinematográfica na India; sicasí, ye solo una parte de la mesma, qu'inclúi otros munchos epicentros n'otros idiomes. Esti términu, acuñáu na década de 1970, provién d'un xuegu de pallabres ente Bombay y Hollywood, el centru de la industria cinematográfica de los Estaos Xuníos.^[1]

Anque a dellos puristes nun yos presta l'usu d'esta pallabra por considerar que'l términu alude a una parodia de Hollywood, esta pallabra fíxose conocida y apaez reconocida nel Oxford English Dictionary. Foi usáu per primer vegada nos años 1970 pol historiador del cine Amit Khanna y la periodista Bevinda Collaco.^[2][3]

El conxuntu formáu por Bollywood y les filmaciones en llingües como maratí, tamil, telugu, bengalí, canarés (kannada) y malayalam, constitúin el nucleu de la industria fílmica de la India. Bollywood ye una pieza fundamental de la cultura popular de la India y el restu del subcontinente Indiu.

La carauterística más representativa de les películes de Bollywood son les sos escenes musicales. Polo xeneral, en cada película inclúyense cantares y dances típiques del país, entemecíes con interesaes coreografíes del pop occidental. Estes escenes apaecen siempres doblaes. Esto ye propiu de la tradición d'esta industria fílmica, na que primero se graben les escenes y depués dóblense tolos diálogos (ye una práutica que facilita, coles mesmes, la posterior traducción a otres llingües), lo que na India (país plurilingüístico, onde se falen 16 idiomes distintos llargamente estendíos) resulta esencial. Les pistes musicales de les películes de Bollywood son producíes munches vegaes por conocíos artistes. Hai ente ellos dalgunos famosos asiáticos como Nusrat Fateh Ali Khan, o occidentales como Andrew Lloyd Weber. Ye costume que la música d'una película se llance al mercáu meses antes del espardimientu del filme. Ye una forma de promocionar el llargumetraxe, yá que, d'esta miente, ye esperáu con mayor interés pol públicu.

1. ↑ Rajghatta, Chidanand (6 de xunetu de 2008). «Bollywood in Hollywood». The Times of India. Consultáu'l 20 de febreru de 2009.
2. ↑ Anand (7 de marzu de 2004). «On the Bollywood beat». The Hindu. Consultáu'l 31 de mayu de 2009.
3. ↑ Subhash K Jha (8 d'abril de 2005). «Amit Khanna: The Man who saw 'Bollywood'». Sify. Consultáu'l 31 de mayu de 2009.