Bruttoinlandsprodukt

S Bruttoinlandbrodukt (Abgkürzt BIP; änglisch gross domestic product, GDP), git dr Gsamtwärt vo alle Güeter aa, d. h. vo alle Waare und Dienstläistige, wo innerhalb vom ene Joor innerhalb vo de Landesgränze von ere Volkswirtschaft häärgstellt worde si minus alli Vorläistige.^[1] Es wärde also nume alli finaale Güeter, also Güeter uf dr Stuefe vo dr Ändverwändig, as Wirtschaftsläistig erfasst. Güeter, wo nit diräkt witerverwändet sondern glaageret wärden, wärde as Vorrootsveränderig berücksichtigt.

Im Underschiid zum Bruttonazionaaliikomme wärde bi dr Berächnig vom BIP nume d Läistige vo Inländer erfasst noch em sogenannte Inlandbrinzip. S Bruttonazionaaliikomme hingege richtet sich noch em Inländerbrinzip. Bi däm wärde au d Läistige vo Bürger berücksichtigt, wo im Usland lääbe. Wemm mä vom BIP d Abschriibige abziet, bechunnt mä s Nettoinlandbrodukt (NIP).

S BIP isch e Määss für die wirtschaftligi Läistig von ere Volkswirtschaft im ene bestimmte Zitruum. D Veränderigsroote vom reale BIP dient as Mässgröössi für s Wirtschaftswaggsdum vo de Volkswirtschafte und isch die wichdigsti Gröössi vo dr volkswirtschaftlige Gsamträchnig.^[2]

S Bruttoinlandbrodukt cha sich uf Staate und au uf anderi administrativi oder geografischi Äihäite bezieh. Mänggisch brucht mä denn d Begriff Bruttoregionalbrodukt, Gross Provincial Product, Bruttowältbrodukt und äänligi.

1. ↑ „Das Bruttoinlandsprodukt (BIP) misst die Produktion von Waren und Dienstleistungen im Inland nach Abzug aller Vorleistungen“, wirtschaftslexikon.gabler.de, abgrüeft am 22. April 2014.
2. ↑ Statistisches Bundesamt: Bruttoinlandsprodukt (BIP), abgrüeft am 20. April 2008.