CFC

Los clorofluorocarbonos (CFC) son derivaos de los hidrocarburos enchíos llograos por aciu la sustitución d'átomos d'hidróxenu por átomos de flúor y/o cloru principalmente.

Los CFC son una familia de gases que s'empleguen en diverses aplicaciones, principalmente na industria de la refrigeración y de propelentes de aerosoles. Tán tamién presentes n'aislantes térmicos. Los CFC tienen una gran persistencia na atmósfera, de 50 a mas o menos 200 años. Col pasu del tiempu algamen la estratosfera, onde se disocian por aición de la radiación ultravioleta, lliberando'l cloru y dando empiezu al procesu de destrucción de capar ozonu. CFC ye'l nome xenéricu d'un grupu de compuestos que contienen cloru, flúor y carbonu, utilizaos como axentes que producen fríu y como gases propulsores nos aerosoles. Les sos múltiples aplicaciones, la so volatilidá y la so estabilidá química provoquen la so acumuladura na alta atmósfera, onde la so presencia, según dellos científicos, ye causante de la destrucción de la capa proteutora d'ozonu.

Anguaño sábese que l'apaición del furacu d'ozonu sobre L'Antártida sureste, a empiezos de la primavera austral, ta rellacionada cola fotoquímica de los CFC presentes en diversos productos comerciales (freón, aerosoles, pintures, etc.). Ello ye que la prohibición de la fabricación y distribución d'esti tipu de gases dexó a la Capa d'Ozonu amosar los primeros nicios de recuperación.