Chile

Chile (spanisch República de Chile, amtle Republik Chile) is a Land im westlichn Siidamerika und ligt zwischn de Breitngrode 17° 30′ S und 56° 0′ S. im Noadn duads an Peru grenzn (aufrana Läng vo 160 Kilomeda), im Ostn an Argentinien (auf 5308 Kilomeda), im Noadostn an Bolivien (auf 861 Kilomeda) und im Westn und Sidn vom Land is da Pazifik. Insgsamt hod Chile a Landesgrenz vo 6329 Kilomeda. D Noad-Sid Ausdehnung vo Chile bedrogt eba 4300 Kilomeda. Zum Stootsgebiet ghead a de Ousdainsl (Rapa Nui), de Insl Salas y Gómez, de Juan-Fernández-Insln (inkl. de Robinson-Crusoe-Insl), de Desventuradas-Insln und im Süden de Ildefonso-Insln und de Diego-Ramirez-Insln. Chile beosprucht a an Tei vo da Antarktis. Iba de Magellanstross, de ganze zu Chile ghead, hods an Zuagang zum Atlantischn Ozean. De easchte Besiedlung vo dera Region losst se auf mindestns 12.000 v. Kr. nochweisn. Ab am 16. Joahundat hamd spanische Conquistadores agfangd de Region zum besiedln und zum undawerfa. Vo 1542 wegad is ois a Teil vom Vizekinereich Peru unda spanischa Kolonialherrschaft gstandn. Am 12. Februar 1818 is nochad Chile duach an Unobhängigkeitsgriag undam Obabefehl vom Bernardo O’Higgins vo da spanischn Kolonialmacht unobhänge woan. Nochm Putsch vom Augusto Pinochet 1973e is as Land 17 Joa vo erm diktatorisch gfiad woan, bis a 1990e aus seim Amt gwäid woan is. Heid is Chile a presidentielle Demokratie. Mid na Bväikarung vo eba 18 Million Eihwohna (2015 gschatzt) is Chile vo de Eihwohna her as sechstgresste und mid na Flächn vo 755.696 Quadratkilomedda as flächnmasse sibtgresste Land in Sidamerika. D Hauptstod mid eba 5 Million Eihwohna is Santiago de Chile und damit de vo de Eihwohna her gseng gresste Stod vom Land. Chile belegt laut am UN-Bericht, nochm Human Development Index an 41. Bloz und innahoib vo Lateinamerika an easchtn. Chile is a Grindungsmitglied vo de Vaeintn Nationa, vo da Union vo Sidamerikanische Nationa und vo da Gmoaschaft vo de Lateinamerikanischn und Karibischn Staatn.