Coda

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A coda^[1][2] (d'o latín <CAUDA^[3]) ye la extremidat posterior de muitas especies d'animals, especialment cuan ixa forma un apendiz móvil, flexible y destinguible d'o torso. A coda ye un apendiz exclusivo cuasi que d'os vertebratos, anque bi ha especies d'invertebratos que gosan tener estructuras caudals que fan recordar a coda d'os vertebratos, como os arraclans y cualques insectos, per o que popularment se les diz tamién «codas».

A coda d'os vertebratos se sostenta en una estructura osia que ye continación natural d'a columna vertebral, dillá d'a cintura pelviana. En as luengas latinas, l'adchetivo que fa referencia a la coda ye «caudal».

As codas gosan desempenyar funcions diversas pendendo d'a especie en a que se troben; En os peixes y bels altros sers vivos acuaticos son estructuras locomotrices que baten d'un costato enta l'altro ta empuchar-se a traviés de l'augua, en bellas especies de cuadrupedos (como os félidos) pueden emplegar-se como estructuras equilibraderas cuan se mueven per puestos estreitos u alturas (p. ex. se piense en os gatos cuan caminan per bel muro) u cuan corren u brincan, en os grans artiodactilos (p. ex. as vacas) y perisodactilos (p. ex. os caballos) pueden bater-se ta espantar as moscas y os tabans, en os masclos d'as aus pueden servir como reclamo sexual (p. ex. o pavo reyal) anque de regular s'emplegan ta equilibrar-se y maniobrar en o volido, en os cetacios sirve ta desplazar-se en l'augua, etcetra.

En o ser humano, como en a resta d'especies de primates homininos, a coda ye una estructura vestichial que no se manifiesta si que en a fase embrionaria y desapareix a moniquet mientres que lo feto va creixendo. Existen casos anomalos de ninons que son naixidos con una coda, pero que no gosa manifestar sisquiera uesos, per lo que se le diz «coda tova». Este defecto, en o primer mundo, se puet correchir con cirurchía simple en o momento d'o naiximiento.

1. ↑ (es) Ángel Ballarín Cornel: Diccionario del Benasqués. Institución Fernando el Católico, Zaragoza, segunda edición 1978. p 263
2. ↑ (es) Fernando Blas Gabarda, Fernando Romanos Hernando: Diccionario Aragonés: chistabín-castellano. (Bal de Chistau). Gara d'Edizions, 2008, p 160.
3. ↑ (es) Ana Leiva Vicén:Léxico aragonés de Antillón (Huesca). Análisis lingüístico (I). Alazet: Revista de Filología Nº 15, 2003, pp. 65-151, ISSN 0214-7602