Drumkorps

n Drum & Bugle Corps (meestieds of ekortt tot Drumkorps) is n muziekkorps wat besteet oet kopperbloazers, slagwoarkers en nen colorguard. Disse bands zeent et bekeandst en meest verspreaid in Amerika en Kannada. De stiel is ook oawer eweeid noar (deeln van) Europa en Azië.

Drumkorpsn zeent organisasies dee gin weenst maken weelt. Ze doot met an wedstriedn, optochtn, festivals en aandere publieke geleagnheedn. Vuur Amerikaanse topkorpsn is dr ne leaftiedsbeteuning, ofhaankelik van n boond woer at ze lid van zeent. Doarvuur mut de leedn aait tusken de 14 en 22 joar wean. Aandere boondn loatt ook junger en eulder too. Boetn Amerika is dr gin leaftiedsbeteuning.

Westriedkorpsn doot zommerdaagns met in toern duur Amerika, langs alle grote drumkorpswedstriedn. Wedstriedn wordt eheuldn op Amerikaanse voetbalveeldn. Ze wordt beoordeeld op et Algehele Plaatjen (General Effect), Visuele Oetvoering (Visual Performance) en Muzikale Oetvoering (Musical Performance). Doarvuur krig et korps n antal peuntn, dee as met mekoar et totale peuntnantal bepoalt.

De korpsn studeert alle joarn in de zommermoandn nen niejen show in, den't tusken de 8 en 12 minuutn doert. Dissen show verbettert ze gedoernde et zommerseizoen. Nen kleainn show hef as vuurdeel det de leedn mear tied en kaans hebt um lastigere dinge an te learn. et Resultaat is ne topprestasie. et Heugtepeunt van et wedstriedverbaand ligt in de finalewekke, an et eande van et seizoen. Dit is meesstieds de eerste wekke van augustus. Wat korpsn hebt verskeaidene muziekstieln an enömn as haandelsmoark. Aandern doot alle joarn wat aanders. Geleefde stieln zeent symfonies, jazz/big band, popmuziek, muziek van bekeande theaterstukke, en Latiens-Amerikaans.

Topkorpsn dee't slim völle an wedstriedn doot, zeent mangs 8 tot 10 wekke op toer. Hierbie is tot wal 12 uur op n dag oefenn gin apartigheaid. Aandere korpsn loatt de leedn wat mear vriej um ook boetn drumkorps wat vrieje tied te hebn. Ook zeent dr nog korpsn dee at helemoal neet an wedstriedn met doot, umdet dee zik mear richt op muziekoonderwies was -wedstriedn. Wieters gef et nog korpsn dee't allene vuur et vermaak bestoat, as leefhebberieje vuur oold-topkorpsleedn.