Klassenkampf

Dr Begriff Klassekampf bezäichnet ökonomischi, politischi und ideologischi Kämpf zwüsche gsellschaftlige Klasse. Noch dr marxistische Theorii si d Inträsse vo de Klasse, wo usbüte und dene, wo usbütet wärde, antagonistisch und füere zu Klassekämpf zwüsche de Usbüter und de Usbütete, wo die menschligi Gschicht und bsundrigs d Revoluzioone aadriibe häi. Im Kampf vo de gsellschaftlige Klasse manifestiert sich lut em Karl Marx dr Widerspruch zwüsche de gsellschaftlige Broduktivchreft (em Entwiggligsstand vo dr Aarbetschraft, de Brodukzioonsmiddel und Brodukzioonstechnike) und de Brodukzioonsverheltniss (bzw. de Äigedumsverheltniss an de Brodukzioonsmiddel) as Klassegeegesatz. Dä wurd schliesslig dur en Umsturz vo dr Klasseherschaft, wie si bestoot, e revoluzionäri Umwälzig vo de Brodukzioonsverheltniss bringe. Im Kapitalismus si die zentrale Klasse in dr Konfrontazioon d Aarbäiterklass und d Kapitalisteklass. D Revoluzioon vo dr Aarbäiterklass, wo dr Marx wäge de krisehafte Entwiggligsgsetz vo dr kapitalistische Brodukzioonswiis erwartet het, wurd dr Klasseherrschaft en Änd gmacht, wenn alli Klassenunderschiid ufghoobe si.