Nehemia

Nehemia is die 16de boek in die kanon van Hebreeuse Geskrifte wat as Ou Testament in die Bybel opgeneem is. Ook Nehemia se optrede is in belang van die tempeldiens deurdat hy Jerusalem, die tempelstad, se mure onder teenstand herbou en die stad beveilig teen die teenstanders van die Jode. Sy hervormings is ook op die behoud van die suiwer tempeldiens gerig. Dieselfde geld vir Esra se optrede saam met hom. Die liefde vir die tempeldiens blyk verder uit die optrede van die priesters en die Leviete. Nehemia, 'n skinker van die Persiese koning, was in alles afhanklik van die Here; dit blyk uit sy kort skietgebede (2:4;6:9) maar veral uit die pragtige langer gebede wat in die boek opgeteken is en uit die woorde waarmee hy sy mense bemoedig het.