Back ናያግራ ፏፏቴዎች Amharic Cataractas d'o Niagara AN شلالات نياجارا Arabic شلالات نياجارا ARZ Catarates del Niágara AST Niaqara şəlaləsi Azerbaijani نیاقارا شلالهلری AZB Ниагара шарлауығы Bashkir Niagaras kriuoklīs BAT-SMG Busay Niagara BCL
Die Niagara-waterval (Engels: Niagara Falls) is een van die grootste watervalle in Noord-Amerika en geleë in die Niagararivier op die grens van Kanada en die Verenigde State van Amerika. Wes van die waterval is die Kanadese stad Niagara Falls in die provinsie Ontario en oos daarvan die Amerikaanse stad Niagara Falls in die deelstaat New York. Dit is een van Amerika se grootste toeriste-aantreklikhede.
Die waterval is 1 155 m breed en die gemiddelde hoogte is 52 m. Wanneer die rivier vir toeriste die sterkste afkom, vloei 1833 m³/s oor die rand van die waterval.
Die Niagara-waterval lê tussen die twee Groot Mere Eriemeer in die suide en Ontariomeer in die noorde. Die Goat-eiland skei die Niagara-waterval in die Horseshoe-waterval in Kanada en die Amerika-waterval in die Verenigde State van Amerika.
Op elke oewer van die rivier en regoor die Niagara-waterval is 'n stad met die naam Niagara Falls. Die een stad is in die staat New York in die V.S.A., en die ander in die staat Ontario in Kanada. Die internasionale grens tussen die V.S.A. en Kanada loop reg in die middel van die Niagara-rivier langs.
Net soos daar twee stede is, is daar, soos reeds genoem, ook twee watervalle: die American Falls is 330 meter breed en 56 meter hoog en dra sowat 5 persent by van die water wat oor die Niagara-val stort. Goat Island, wat op die rand van die waterval lê, skei die American Falls van die indrukwekkende Canadian Falls, wat ook as die Horseshoe Falls bekend staan.
Hierdie val is sowat 800 meter breed en 50 meter hoog; sowat 95 persent van die water van die Niagara-rivier stort oor hierdie val. Die groot volume water wat oor die Canadian Falls val, het tot gevolg gehad dat die gesteentes weggeërodeer is tot die kenmerkende perdehoefvorm, waarvandaan die val sy naam kry. In die afgelope twintig jaar het die Amerikaanse en Kanadese regerings saamgespan in 'n projek om 'n deel van die water te herlei voordat dit die Niagara-val bereik en dit vir die opwekking van hidroëlektriese krag te gebruik.
Gevolglik stort minder water oor die val, wat 'n vermindering in erosie aan die rand daarvan beteken. Die hidroëlektriese krag word deur die twee stede gebruik. Die twee stede Niagara Falls is beroemde toeriste-oorde, want meer as 2 000 000 mense besoek jaarliks die Niagara-val. Een van die beste plekke waarvandaan die waterval aanskou kan word, is Table Rock House op die Kanadese oewer.
Besoekers kry hier waterdigte jasse en word dan in hysers na benede geneem en deur ondergrondse gange gelei totdat hulle agter die val self staan. Dit is 'n onvergeetlike ondervinding om daar te staan en te sien hoe miljoene tonne water voor 'n mens verbystort. Agter die American Falls het die water 'n reuse gat weggeërodeer wat bekend staan as die Cave of the Winds. Dit kan ook bereik word deur 'n stelsel van hysers en ondergrondse gange.
Prospect Point, aan die Amerikaanse kant, en Oaks Garden Theatre, aan die Kanadese kant, bied albei 'n goeie algemene uitsig op die hele val, terwyl motoriste voor albei valle verbyry op die Rainbow Bridge, 'n 500 meter lange boogbrug wat die twee Niagara Falls-stede verbind.