Oscar

Dr Oscar (äigentlig dr Academy Award of Merit) isch e Filmbriis. Er wird jöörlig vo dr amerikanische Academy of Motion Picture Arts and Sciences (AMPAS)^[1] für die beste Film vom Vorjoor vergee, isch aber wäge dr Zuelassigsbrozeduur bis uf wenigi Usnaame uf d US-Brodukzioon beschränkt. D Verleijige findet jewils im Februar z Los Angeles statt und bezücht sich uf Film us em Vorjohr.

D Uszäichnig isch am 12. Februar 1929 vom domoolige Bresidänt vo de MGM Studios, em Louis B. Mayer, ins Lääbe grüeft worde, fast nüün Joor noch dr Verleijig vom Photoplay Award, wo as dr erst Filmbrii überhaupt gältet. Dr Oscar wird jedes Joor in ere Zeremonii vergee, zur Zit in über 30 verschidnige Kategorie. Er het d Form von ere Statuette vom ene Ritter mit eme Schwärt, wo uf ere Filmrolle stoot.

Usser für die amerikanische Spiilfilm git s Kategorie für Churz-, Dokumentar- und Animazioonsfilm. Usländischi Film si in ere Kategorii für sich. Für dass sich e amerikanische Spiilfilm für d Uswaal cha kwalifiziere, muess er im Joor vor dr Verleijig mindestens siibe Dääg lang im ene öffentlige Kino im Gebiet vom Los Angeles County – em Häimetbezirk vo Hollywood – eme zaalende Publikum zäigt worde si.

1. ↑ Archivierte Kopie. Archiviert vom Original am 23. Juni 2011; abgruefen am 27. Juni 2011.