Pallabres derivaes

La derivación o pallabres derivaes ye unu de los procedimientos de formación de pallabres, y dexa a les llingües designar conceutos rellacionaos semánticamente con otros per un sitiu consideraos como primitivos, añadiendo afixos (y.j cuchellada de cuchiellu).^[1] La derivación permite que'l léxicu designe numberosos sentíos a partir d'un númberu muncho más pequeñu de raigaños o lexemes. En munches llingües, la derivación ye la principal fonte de nueves pallabres, anque tamién hai llingües ensin derivación, principalmente llingües aislantes, con tendencia a usar más la composición.

La derivación oldea cola flexón: dambes usen morfemes añadíos al raigañu pa espresar diferencies, pero la flexón nun porta cambéu de referentes sinón que les marques añadíes tienen un fin puramente gramatical. La derivación ye tresparente pa la sintaxis, la flexón non. Amás la derivación con frecuencia porta cambéu de categoría gramatical (por casu, el verbu materializar deriva del axetivu material, que de la mesma deriva del sustantivu materia), ente que na flexón siempres se caltién la categoría gramatical (por casu les formes flexives cantar, cantaben, cantando son siempres verbales; les formes enfermeru, enfermeres son siempres sustantivos).

Per otru llau la derivación paezse a la composición no que cinca a los cambeos de significáu, cola diferencia de que mientres la derivación usa afixos ensin significáu propiu (como -izar añadíu a material pa formar materializar), na composición xúntense morfemes qu'aisllaos yá tienen significáu (como tela y araña en telaraña).

1. ↑ Martínez Jiménez, José Antonio; Muñoz Marquina, Francisco; Sarrión Mora, Miguel Ángel (2011). «Análisis morfológico. La formación de palabras: Derivación y composición», Lengua Castellana y Literatura, Akal, Akal Sociedad Anónima, páx. 9. ISBN 9788446033677.