Polis

As Polis (altgriech. πόλις pólis ‚Stadt, Staat‘; Plural Poleis vo πόλεις póleis) wird gwöönlig dr antiki griechischi Stadtstaat bezäichnet, mit eme stedtische Siidligskärn, dr Stadt (ἂστυ asty), und em Land drum, wo drzue ghöört het (χώρα chōra) und wo d Iiwooner von em de Iiwooner vom urbane Zentrum rächtlig gliichgsetzt gsi si. Die tüpischi Polis isch e Bürgergmäind bzw. e Personeverband gsi und het sich nit brimär über iir Territorium definiert, sondern über iiri Mitgliider.

Sit dass d Polis in archaischer Zit entstande isch und wil s im Hellenismus e Hufe Nöigründige gee het, isch d Middelmeerwält über Joorhundert ewäg stedtisch brägt gsi, au wenn d Meerhäit vo de Lüt uf em Land gläbt häi. S römische Riich het sich grad im Oste stark uf die Poleis gstützt, wo denn nume no halbautonom gsi si. In dr Spootantike häi si an e Hufe Ort e langsame Niidergang erläbt. Im 6. Joorhundert het dr Kaiser Justinian non e letschts Mol brobiert, d Posizioon vo de Stedt zu sterke, was aber nid glungen isch und die Islamischi Expansioon im 7. Joorhundert het ändgültig zum Undergang vo de mäiste Poleis gfüert. Im Byzantinische Riich si die mäiste Stedt befestigti Kastron worde, wo vilmol relativ seer vil chliiner gsi si.