Porteru

En munchos deportes d'equipu, un porteru ye un xugador designáu que s'encarga direutamente d'evitar que l'equipu rival marque un gol defendiendo la portería o arcu. Tal posición esiste, por casu, en fútbol asociación, fútbol gaélico, fútbol de regles internacionales, balonmano, ḥoquei, netball, water-polo, lacrosse y floorball. A nivel profesional, ye un puestu altamente especializáu, polo cual los porteros suelen cubrir namái esta posición, ente que los xugadores d'otres posiciones nun suelen cubrir el puestu de porteru. Una plantía d'un equipu profesional usualmente cuenta con dos o trés porteru, anque solo puede haber unu d'ellos nel campu mientres el desenvolvimientu del xuegu en dicha posición.

Usualmente aplíquense regles especiales pa estos xugadores que nun s'apliquen al restu. Estes regles de cutiu instáurense pa protexer al porteru, siendo este un oxetivu obviu p'acciones peligroses y violentes. Amás, en dellos deportes como'l ḥoquei, tienen de llevar un equipamientu especial como guantes y una mázcara pa evitar que los disparos del oxetu en xuegu cáusen-yos mancadures. Esta disposición a recibir ataques, fai que los porteros tengan de tener una preparación psicolóxica distinta al del restu de los sos compañeros, y amás suelen ser los encargaos de coordinar al equipu mientres cumple funciones defensives. Tamién, de cutiu, estos xugadores tán identificaos pol dorsal númberu 1.