Prithivi

D Prithivi oder Prithvi Mata (Sanskrit: पृथिवी माता, Pṛthivī Mātā f. „Muetter Erde“; Pali: Paṭhavī) isch d Erdmuetter im Vedismus.

D Prithivi werd im Rigveda zäme mitem Himelsgott Dyaus i sechs Hymne as Paar Dyava-Prithivi agrueffe. Im Gegesatz zum Dyaus, wo nie elai gnennt werd, cha si aber au elai agrueffe were. D Prithivi isch d Muetter vo alne Wese. Si blibt immer jung und isch fründli zu allne Gschöpf. Im früene Hinduismus werd d Prithivi as Töchter vom König Prithu bitrachtet.

D Prithivi Mata dörft e Fortsetzig vonere vermuetete urindoeuropäische Erdmuetter *Pl̥th₂uih₂ meh₂tēr sii.