Religionsfreiheit

D Religionsfreiheit isch eins vo de elementare Grund- und Menscherächt, wo vor allem in dr Freiheit vom ene Einzelne bzw. von ere Gruppe vo Mensche bestoht, siini Glaubensüberzügig oder e wältaaschauligs Bekenntnis frei z bilde oder drfür z wärbe, zun ere Religions- oder Weltaaschauigsgmeinschaft zghöre und si Religion oder Weltaaschauig ungstört uszüebe und in ihrem Gesit z handle. Dodrzue ghört au d Freiheit, kultischi Handlige frei uszüebe (Kultusfreiheit).

Dr Begriff vo dr Religionsfreiheit umfasst e positive und e negative Aspäkt:

• Under dr positive Religionsfreiheit wird d Freiheit vom ere Person oder von ere Gruppe vo Mensche verstande, e Religionsgmeinschaft jederziit z gründe oder sich ihr aazschliesse und an kultische Handlige, Fiirlikeite oder bi andere religiöse Praktike mitzmache. Drzue ghört au d Freiheit, für die persönlige religiöse/wältaaschaulige Überzüügige iizdrätte, und au s Rächt, Eidesformle in ere Form abzlege, wo nit nume religiös/wältaaschaulig neutral isch.

• Under dr negative Religionsfreiheit wird d Freiheit vom ere Person oder von ere Gruppe vo Mensche verstande, zu keinere oder nit zun ere bestimmte Religionsgmeinschaft z ghöre bzw. e so eini jederziit chönne z verloo und au nit zun ere Deilnahm an kultische Handlige, Fiirlikeite oder andere religiöse Praktike zwunge z wärde. Drzue ghört au d Freiheit, nit über die persönlige religiöse/wältaaschaulige Überzüügige z rede, wie au s Rächt, Eidesformle in ere religiös/wältaaschaulig neutrale Form abzlege.