Selbstbildnis

E Sälbstbordret isch e Daarstellig, wo e bildende Künstler mit de Middel vo dr Moolerei, dr Grafik, dr Blastik oder dr Fotografii vo sich sälber macht.

Die erste Sälbstbordret söll s scho in dr Antike gee haa. Dr berüemt griechisch Bildhauer Phidias söll sich sälber uf em Schild vo dr Statue vo dr Athena Partenos abbildet haa.

Us dr middelalterlige Kunst sind kuum Sälbstbordret überliiferet.

Sit dr Zit vo dr Rönessans het sich dr sälbstbewussti Künstler nüme nume für e Handwärker ghalte, sondern het dänkt, ass er grad so guet sig wie d Filosofe, Literaate und Wüsseschaftler, und er het sich im Sälbstbordret e Dänkmol gsetzt. Näbe dr Usenandersetzig mit dr äigene Füsiognomii, wo e billigs Modell isch, wo mä immer cha druf zruggriffe, si e Hufe Sälbstbordret au Züügnis vo dr innere Usenandersetzig vom Künstler mit sich sälber, mit de äigene Stimmige, wie si sich verändere und dr äigene Vergängligkäit.