Sitbank

'n Sitbank, ook 'n rusbank genoem, is 'n meubelstuk waarop een of meer mense kan sit. Daar word gewoonlik kortweg van 'n bank gepraat. Banke is langwerpig en het soms armleunings en 'n rugleuning om ekstra ondersteuning te bied. Banke sonder 'n rugleuning kan van twee kante gebruik word. In alle gevalle bied die bank sitplek vir meer as een persoon op 'n slag.

Banke word binnenshuis in sitkamers as deel van 'n bankstel aangetref, maar word ook in ander kamers gebruik. Buitekant word banke algemeen in tuine en publieke areas geplaas. Mense kan ook op 'n bank lê, hoewel dit gewoonlik nie die hoofdoel van die bank is nie. In sommige openbare ruimtes, soos lughawens, word stoele eerder as banke aangebring om te voorkom dat mense daarop lê en sodoende te veel spasie opneem.

Banke in huise en ander geboue word gewoonlik opgestop en met leer of sagte materiaal oorgetrek. Banke wat aan die elemente blootgestel is, is gewoonlik hard en van sterker materiale soos metaal, hout of klip vervaardig.