Skrynwerker

'n Skrynwerker is 'n persoon ('n tipe timmerman) wat houtvoorwerpe wat in huise gebruik word bou, monteer, installeer en herstel. Dit sluit voorwerpe soos deure, ingeboude kaste, kombuiskaste en vensterrame in; asook meubelstukke soos stoele, tafels, boekrakke en ander items van hout.

Skrynwerk word op konstruksieterreine, in werkswinkels of by privaat wonings verrig. Tipiese gereedskap wat gebruik word is die saag, beitel, skaaf, hamer, spykers, boor en skroewedraaier.

Skrynwerkers ontvang meestal nie formele opleiding nie, maar word in-diens opgelei. Hulle moet prakties wees en daarvan hou om met hulle hande te werk. Skrynwerkers werk dikwels op hoë plekke (soos 'n huis se dak) en moet oor goeie sig en 'n sin vir balans beskik. Hulle moet goed kan kommunikeer en 'n projek van begin tot einde kan deursien, van die aankope, vervaardiging, installering, tot die uiteindelike afronding van die produk.