Back سياغريوس Arabic Сиагрий Bulgarian Syagrius Breton Siagri (rei dels romans) Catalan Syagrius Czech Syagrius Danish Syagrius German Συάγριος Greek Syagrius English Siagrio Esperanto
Dr Syagrius, wo bis öppen anne 486 gläbt het, isch der letscht röömisch Fürscht vo Nordgallie gsi.
Er isch dr Soon vom röömische Gäneraal Aegidius. Dä isch e Komandant vom röömische Militäär gsi und schynts e guete Fründ vom weschtröömische Chaiser Majorian, wo no es letschs Mol i grosse Teil vom weschtröömiche Rych en äinigermaasse stabyli Regierig duregsetzt het, aber denn anne 461 nach emene Staatsschtreich vom Gäneraal Ricimer tötet worden isch. Do druufabe het dr Aegididus z Gallien es regionals Herrschaftspiet ygrichtet, wo vo Rom unabhängig gsi isch. Me het döört no nach dr röömischen Art gläbt und was vo dr röömische Armee am Rhy, wo men ere exercitus Gallicanus gseit het, no umme gsi isch, het jetz em Aegidius syni Macht usgmacht. Dr Aegidius isch öppen anne 464 gstorbe.
D Hauptstadt vom Aegidius sym regionale Rych isch Augusta Suessionum, die hütigi nordfranzöischi Stadt Soissons gsi. Das Piet, wo dr Aegidius drüber regiert het, isch bis an Atlantik gange; im Süüde sind d Weschtgoote, im Südoschte d Burgunder und im Nordoschte, i der alte röömische Provinz Belgica, d Franke gsi, alles germanischi Völker, wo jetz uf altem röömischem Bode sin cho woone.
Dr Syagrius isch öppen anne 465 sym Vater syn Noochfolger als Fürscht vo Nordgallie woorde. Was me vo iim hüt no weiss, het s meischte dr Bischof Gregor vo Tours ufgschribe, wo im sächste Joorhundert gläbt het.
Em Syagrius isch die röömischi Tradizioon öppis wichtigs gsi. Drum het är sys Land als Teil vom ganz röömische Rych agluegt und gseit, er sig en Undergäbene vo de oscht- und de weschtrömische Chaiser, wo vonne aber kei praktischi Hilf me für Gallie choo isch.
Anne 481 oder 482 isch dr Frankechönig Childerich gstoorbe, wo dr Syagrius mit em guet uscho isch. Bim Childerich sym Soon, em Chlodwig, isch das öppis anders gsi. Anne 486 oder 487 isch dr Chlodwig em Syagrius sys gallische Rych cho agryffe und er het dr Kampf gwunne. Uf ei Schlaag isch s letschte gallisch-röömische Piet au no germanisch woorde und de Franken iires Territorium isch jetz vill gröösser gsi. Das isch der Afang vo dr Vorgschicht vom hütige Frankrych.
Dr Syagrius het sich uf Südfrankrych chönne rette. Dr weschtgotisch Chönig Alarich het en aber den em Chlodwig uusgliferet; und dänn het ne lo tööde.
Die Gschicht luegt men als s Ändi vo der spootantike Zyt z Gallien und dr bedüütendscht Momänt vom Uufstiig vo de Merowinger aa.