Back Thunderbolt AN منفذ الصاعقة Arabic থান্ডারবোল্ট Bengali/Bangla Thunderbolt Catalan Thunderbolt Czech Thunderbolt (Schnittstelle) German Thunderbolt (interface) English Thunderbolt (bus) Spanish Thunderbolt Estonian Thunderbolt Basque
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Thunderbolt is die naam en handelsmerk vir 'n hardeware-koppelvlak wat deur die Amerikaanse onderneming Intel, Inc. in samewerking met Apple Inc. ontwikkel is om eksterne toestelle met 'n rekenaar te verbind. Dit is aanvanklik onder die naam Light Peak ontwikkel en vir die eerste keer op 24 Februarie 2011 as deel van 'n toestel bemark. Light Peak is oorspronklik vir optiese kabels ontwikkel, maar deur Apple en Intel vir die Thunderbolt-standaard aangepas om inligting ook met koperkabels oor te dra. So kon Thunderbolt as opvolger van die verouderde FireWire-koppelvlak bemark word.[1]
Tot dusver is drie variante op die mark ingevoer. Thunderbolt 1 en 2 maak gebruik van dieselfde verbinder soos die Mini DisplayPort (MDP)-koppelvlak. Vir Thunderbolt 3 word die USB-C-verbinder gebruik.[2] In 'n enkele kabel kombineer Thunderbolt PCI Express (PCIe) en DisplayPort (DP) as twee seriële seine en voorsien toestelle daarnaas ook van gelykstroom (maksimaal 100 W). Maksimaal ses eksterne toestelle kan met een enkele verbinder aan 'n rekenaar gekoppel word.
Thunderbolt is vir die snelle oordrag van data ontwikkel. Terwyl USB 2.0 'n maksimale snelheid van 480 Mbis/s kan bereik, wat met die nuwe standaard USB 3.0 verhoog is tot 5 Gbps, het die Thunderbolt-standaard reeds in sy eerste generasie voorsiening gemaak vir 'n teoretiese snelheid van 10 Gbis/s. Thunderbolt 2 het hierdie snelheid verdubbel tot 20 Gbis/s. Die nuutste standaard Thunderbolt 3 maak voorsiening vir 'n teoretiese maksimale snelheid van 40 Gbis/s.
Hierdie soort snelhede word benodig om byvoorbeeld 'n rekenaar met 'n enkele kabel met twee 4K-skerms (4 096 x 2 160 beeldpunte met 60 Hz) te koppel en gelyktydig data met USB 3.1 (teen 'n snelheid van 10 Gbis/s) en 'n ethernet-netwerk oor te dra. Die twee 4K-skerms kan deur 'n enkele 5K-skerm (met 5 120 x 2 880 beeldpunte teen 60 Hz) vervang word. Met enkele rekenaars (soos Apple se nuutste tafelrekenaar iMac Pro of die 15 duim-skootrekenaar MacBook Pro) kan maksimaal vier 4K- of twee 5K-skerms met 'n Thunderbolt-kabel gekoppel word.[3]