Wahn

Under em Begriff Waan verstoot mä in dr Psüchiatrii en inhaltligi Dänkstöörig. Dr Waan isch en inhaltlig falschi Überzüügig, wo d Lääbensfüerig behinderet und wo dr Paziänt nid ufgit, au wenn si mit dr Realidäät, wo mä objektiv cha nochbrüefe, nit im Äiklang isch. Er isch also e Stöörig vom Urdäile.

Dr Waan gältet as Zäiche von ere psüchische Stöörig, und cha under anderem bi schizofrene Psüchoose, bi affektive Stöörige (schweri epressioon oder Manii mit psüchotische Sümptoom), bi Demänze und andere psüchische Chrankhäite mit oder ooni diagnostizierbare organische Ursache ufdräte.

Innerhalb vo de Demänze isch d Prevalänz bi de Demänzarte verschiide usbrägt: Morbus Alzheimer 59 %; Vaskuläri Demänz 72 %; Lewy-Body-Demänz 57 % und frontotemporaali Demänz 62 %.^[1] As singuläärs Sümptoom existiert dr Waan au as sogenannte „isolierte Waan“, zum Bischbil in Form vom ene Iifersuchtswaan bi Alkoholabhängigkäit.

Dr Waan isch also zerst emol e Sümptoom für e Chranket, und cha vo verschidnige Chrankäite choo und alli mööglige Ursache haa. Mä gränzt dr Waan ab vom Zwangsgedanke, won em seer äänlig schiint und au im Inhalt nooch fast idäntisch isch, aber bim Zwangsgedanke wüsse die Betroffene, ass iiri Zwangsvorstellige nit dr Realidäät entspräche.

1. ↑ Chiu MJ, Chen TF, Yip PK, Hua MS, Tang LY. Behavioral and psychologic symptoms in different types of dementia. J Formos Med Assoc. 2006 Jul;105(7):556-62.