Charles Rudd

Charles Dunell Rudd
Foto van Rudd deur 'n onbekende fotograaf, vanuit Zimbabwe se nasionale argiewe
Gebore	Charles Dunell Rudd 22 Oktober 1844 Hanworth Hall, Norfolk, Engeland
Sterf	16 November 1916 (op 72) Londen, Engeland
Nasionaliteit	Verenigde Koninkryk
Bekend vir	Sakevennoot van Cecil John Rhodes

Charles Dunell Rudd (22 Oktober 1844 - 16 November 1916) was 'n vennoot van Cecil John Rhodes en is in Hanworth Hall, Norfolk, Engeland gebore. Hy ontvang opleiding in Harrow en Cambridge en was ook 'n goeie atleet. Hy kom op 22-jarige ouderdom in die Kaap aan en jag etlike jare saam met John Dunn. Hy vertrek na Kimberley en ontmoet daar vir Cecil John Rhodes. Hulle vorm 'n vennootskap en koop elk 'n kwart kleim in die De Beersmyn. Dit lei tot die eindelike ontstaan van De Beers Consolidated Mines. Gedurende 1883 word Rudd 'n lid van die Kaapse Parlement. Hier was hy verantwoordelik vir wetgewing om onwettige diamanthandel te beëindig. Hy speel 'n groot rol in die stigting van die maatskappy Goldfields of South Africa. Gedurende 1888 gaan hy na Matabeleland en verkry namens Rhodes 'n konsessie van Lobengula waarop die oktrooi vir die British South Africa Company gebaseer is. Hy is oorlede in 1916.