Hoogyslands

Hoogyslands (háfrónska) is 'n ultrapuristiese newevorm van die moderne Yslands. Die Yslandse naam 'háfrónska' is gevorm na die voorbeeld van die naam 'høgnorsk' (Hoognoors), die konserwatiefste vorm van die Nynorsk. Frónska is 'n digterlike benaming vir die Yslandse taal en is afgelei van frón, een van die name vir die aarde uit die Snorra-Edda. Hierdie taalvariant is byna uitsluitlik 'n eenmansprojek van die Belg Jozef Braekmans. Hy het ou neologismes (bv. bjúgaldin, boogvrug, banana) saamgevoeg met eie nuutskeppings ter vervanging van leenwoorde waarvoor geen suiwer Yslandse woord bestaan nie.

Die nadruk lê op ultrapurisme. Dit beteken dat letterlik alles vertaal word, dus ook persoonsname, aardrykskundige name, skeikundige terme, name van planete, ens. Kenmerkend van Hoogyslands is ook die gebruik van kenninge (poëtiese omskrywinge) vir wetenskaplike terme.

In 2005 het hy die sentrum van die Hoogyslandse taal opgerig. Sy oogmerk is 'n so suiwer moontlike taalvorm vir Yslanders wat nie akkoord gaan met die taalkundige internasionalisering nie. Die projek het in Ysland aandag gekry, maar Hoogyslands geniet geen amptelike status nie. Die Yslander Pétur Þorsteinsson is die voorsitter van die Hoogyslandse taalbeweging.