Rooi Rose was 'n Afrikaanse maandelikse vrouetydskrif wat in Suid-Afrika deur Caxton Magazines uitgegee is. Die eerste Rooi Rose verskyn in April 1942 met Mark Preston as skrywer. Die tydskrif het die lig gesien ten spyte van die Tweede Wêreldoorlog en probleme met die beskikbaarheid van papier. Die laaste uitgawe verskyn in Junie 2020.[1]
Hierdie tydskrif word soms voor erkenning gegee as die begin van Charlize Theron se loopbaan, deur die Rooi Rose Supermodel van die Jaar -kompetisie.[2]
Rooi Rose begin in 1944 weer herleef toe AM van Schoor en Hendrikus Potgieter by Marius Jooste se kantoor instap en voorstel dat die Afrikaans Pers Beperk, later Perskor, die tydskrif by hom (Potgieter) oorkoop.
Jooste en Van Schoor het R200 by 'n bank geleen en toestemming by die APB se direksie gekry. Later stel APB 'n voltydse redakteur aan, RP Visser, opgevolg deur ID van der Walt. Van Schoor word ondertussen redakteur van die Die Huisgenoot. Van der Walt vertrek in 1959 na Brandwag en Ulrich Stark wat voorheen by Die Vaderland gewerk het, neem oor, en kry bydraes deur André P. Brink, Len Lindeque en Ela Spence. Die eerste redaktrises was Susan de Winter en Martie Snyman.
Die tydskrif het aanvanklik ontspanningsverhale gebied, maar berig later ook oor aktuele onderwerpe soos die ontstaan van die Verenigde Nasies, die besoek van Koning George VI en sy gesin (1947), asook deurbrake op die mediese gebied. Teen 1960 was Rooi Rose 'n eenkleurblad (met die uitsondering van die buiteblaaie) van 120 bladsye per kopie. In 1970 word die tydskrif volkleur (wat ook handel oor modes en resepte) en teen die 1980's beslaan die inhoud glansfigure, modes, kos, heelwat brei- en hekelpatrone.
Die 1990's word, wat modes betref, 'n mengelmoes van grunge, unisex, punk, terughunkering na die natuur (katoen en linne) en teen die millenniumwending gaan dit oor die smaak wat by die individu pas. Die vroeë 21ste eeu word ingelui met die digitale era en 'n tydsgees van kitsroem. Teen November 2000 word Rooi Rose die eerste Afrikaanse maandblad, met profielartikels oor bekendes soos Helen Suzman, Patricia de Lille, Antjie Krog en Anna-Mart van der Merwe, soms ook Susan Coetzer en Bettie Kemp.
Met die skryf van François Verster se artikel in die Kaapse Bibliotekaris van Julie/Augustus 2016, is die maandblad se grootste uitdaging die internasionale tendens wat die digitale eeu teweegbring met die gewildheid van papiermedia wat taan. Tog beskik die Rooi Rose oor 'n "uiters lojale leserskring, wat steeds groei en diversifiseer".
Rooi Rose se sirkulasie tydens die tweede kwartaal van 2016 was 63 704, vergeleke met sy mededinger Sarie se 71 124.
- ↑ Monsieur, Janie (4 Julie 2020). "Ná 78 jaar groet 'rooi rose' finaal". Maroela Media. Geargiveer vanaf die oorspronklike op 4 Julie 2020. Besoek op 5 Julie 2020.
- ↑ "Models vie for spot in TV reality show" (in Engels). Independent Online. Geargiveer vanaf die oorspronklike op 21 Augustus 2010. Besoek op 7 Julie 2008.