Rubicon

Rubicone
Die Rubiconrivier.
Veronderstelde ligging
Oorsprong	40 km noordoos van Florence, Italië
Monding	naby San Mauro a Mare, Italië Adriatiese See
Stroomgebied	Emilia-Romagna, Italië
Lengte	29 km
Mondinghoogte	0 m

Die Rubicon (Italiaans: Rubicone) is 'n rivier in die noorde van Italië. Die rivier is vlakkerig, 29 kilometer lank en vloei deur die streek Emilia-Romagna. Dit ontspring in die Apennyne-bergreeks en mond uiteindelik in die Adriatiese See, suid van Ravenna uit. Die Latynse woord "rubico" kom van die byvoeglike naamwoord "rubeus", wat "rooi" beteken. Die rivier is so genoem omdat sy water deur afsettings rooierig gekleur is.

Ten tye van die Romeinse Republiek was die Rubicon die grens tussen Latium, wat deur die Senaat bestuur is, en die Romeinse provinsie Gallia Cisalpina. Volgens die Romeinse wet mag geen generaal met 'n staande leer die Rubicon oorgesteek het nie. Indien dit wel sou gebeur, sou die generaal beheer oor sy provinsie verloor en sy soldate sou die wet oortree as hulle sy bevele uitvoer.

Die rivier word bekend nadat Julius Caesar en sy legioene die rivier in 49 v.C. suidwaarts kruis. Dit is as 'n opstand beskou en 'n staatsgreep word onvermydelik. Caesar maak tydens die oorsteek 'n toespraak en sê: "Alea iacta est" (Latyn: die teerling is geworpe / die dobbelsteen is gegooi).

Die gebeurtenis gee aanleiding tot die slagspreuk: "Die Rubicon oorsteek", wat beteken dat 'n betwisbare daad verrig word, wat nie ongedaan gemaak kan word en waarvan daar nie later teruggekeer kan word nie.

Dit is egter nie duidelik of die historiese Rubico dieselfde as die huidige Rubicon is nie (hoewel meeste bewyse dit wel bevestig).^[1] Die huidige rivier kry sy naam in 1933 nadat Benito Mussolini die plek Savignano nel Romagna na Savignano sul Rubicone vernoem het.^[2]

1. ↑ Jona Lendering, Rubico (49 v.C.), Livius.org
2. ↑ "Fiume Rubicone, Miti di Romagna". Geargiveer vanaf die oorspronklike op 10 November 2012. Besoek op 10 Januarie 2014.