August Bebel

Dr Ferdinand August Bebel (* 22. Februar 1840 z Deutz bi Köln; † 13. Augschte 1913 z Passugg) isch en Politiker vo de sozialdemokratische Arbaiterbewegig z Dytschland gsii. Sy bolitischi Aafäng hän im liberal-demokratische Verainswäse vu Arbaiter un Handwärcher gwurzlet, voreb er sich em Marxismus zuegwändet het. Iber Johrzehnt het er mit em Wilhelm Liebknecht zämmegschafft. Mit ihm het er anne 1869 di Sozialdemokratisch Arbaiterbartei (SDAP) grindet. Im Johr 1875 het er bi dr Verainigung mit em Allgmaine Dytsche Arbaiterverain zue dr Sozialistische Arbaiterbartei vu Dytschland (SAPD) mitgmacht. In dr Zyt vu dr Repressionen gege d Bartei dur s Sozialischtegsetz het er si zue dr zäntrale Person vu dr dytsche Sozialdemokraty entwicklet un isch ab 1892 ain vu dr beede Vorsitzer vu dr Sozialdemokratische Bartei vu Dytschland (SPD) gsii, wu si d SAPD anne 1890 no dr Ufhebig vum Gsetz dry umgnännt gha het. Sy Popularitet spieglet sich in dr volkstimlige Näme „Chaiser Bebel“, „Gegechaiser“ oder „Arbaiterchaiser“.^[1] In dr Johr derno isch er wyter am Spitz vu dr Bartei gstande un isch Rebresäntant vum sognännte marxistische Zäntrum vu dr SPD gsii zwisch eme linke un eme „revisionistische“ Fligel. Derzue isch er ain vu dr wichtigschte Barlamentarier in dr Zyt vum Dytsche Chaiserrych gsii.

1. ↑ Brigitte Seebacher-Brandt: Bebel. Künder und Kärrner im Kaiserreich J.H.W. Dietz Nachf., Berlin 1988, ISBN 3-8012-0137-6 S. 13