August Macke

Dr August Robert Ludwig Macke (* 3. Januar 1887 z Meschede, Hochsauerland; † 26. Septämber 1914 bi Perthes-lès-Hurlus, Champagne) isch eine vo de bekanntiste dütsche Mooler vom Expressionismus. Er isch e Fründ vom Franz Marc gsi, won er 1910 kenneglehrt het. Er het an beide Usstellige vom Blaue Reiter usgstellt. Im April 1914 het er mit em Paul Klee und em Louis Moilliet e Reis uf Tunesie gmacht. Er isch churz noch em Aafang vom Erste Wältchrieg iizooge worde und am 26. Septämber 1914 im Alter vo 27 Johr an dr Westfront gfalle.

In öbbe zäh Johr, wo dr Macke an siim Wärk gschafft het, het es sich under em Iifluss vo de vilfältige Kunstströmige in siiner Zit stilistisch rasch veränderet, bis er si persönlige Stil gfunde het, wo brägt isch vo dr Wirkig vom Liecht und vo de suubere, lüüchtende und harmonierende Farbe, won er bruucht het. Siini Bilder wirke heiter und liicht, alles Dragische isch ihne fremd.