D Henriette Engbersen (* 1980 z Holand[1]) isch e Schwiizer Schurnalischtin.
Si isch z Romanshorn und z Salmsach im Kanton Tuurgau ufgwachse. In ihrere Jugendzyt het si sech als Leiterin vom Cevi engaschiert.[2] Bis ane 2002 het si s Lehrerseminar z Chrüüzlinge bsuecht und dänn ane 2006 z Winterthur a dr ZHAW dr Bachelor in Kommunikazion und Schurnalismus gmacht.[3] Drno het si bim Sanggaller Tagblatt, als Videoschurnalischtin bi Tele Oschtschwiiz und dänn als Oschtschwiiz-Korespondäntin vo SRF gschaffet. Derzue ane het si 2012 au no dr Master of Arts für visuelli Komunikazion a dr ZHdK gmacht. Für d Tuurgauer Landeschile isch si i dr Jury vom Projäkt «Prix Diakonie».[4]
Sid ane 2017 brichtet d Engbersen, als Nochfolgerin vom Urs Gredig, als Korespondäntin für s Schwiizer Färnsee us Ängland und us Irland.[5] I dere Zyt isch d Gschicht vom Brexit es grosses politischs Thema, und so het d Engbersen ungwöönlech hüffig öppis vo de britische Insle für d Schwiiz z brichte.[6]
- ↑ Im Gespräch mit England-Korrespondentin Henriette Engbersen Artikel im Seeblick uf romanshorn.ch vom 9. Novämber 2018
- ↑ «Die vielen Anrufe waren verdächtig» Artikel uf kirchenbote-tg.ch vom 10. Oktober 2017
- ↑ Henriette Engbersen under Dozierendi uf de Website vo de Volkshochschuel Frauefäld (vhsf.ch) abgruefen am 29. Mai 2019
- ↑ Thurgauer Kirchen suchen originelle Diakonie-Projekte Mitteilig uf ref.ch vom 8. Januar 2019
- ↑ SRF: Henriette Engbersen folgt auf Urs Gredig in Grossbritannien Artikel uf kleinreport.ch vom 12. Februar 2017
- ↑ «Die Wähler sind frustriert über das Brexit-Gerangel» Tagesschau uf srf.ch vom 3. Mai 2019