Ludwig XIV.

Dr Louis XIV. (au Louis le Grand, dütsch Ludwig XIV.; * 5. Septämber 1638 z Saint-Germain-en-Laye; † 1. Septämber 1715 z Versailles) isch vo 1643 aa Köönig vo Frankriich und Navarra gsi. Mä säit em au „dr Sunneköönig“ (frz. le Roi-Soleil).

Dr Louis XIV. gältet as dr klassischi Verdräter vom höfische Absolutismus. Dr Läitsatz vom Absolutismus, L’État, c’est moi! – Dr Staat bin ich!, wird im aber felschligerwiis zuegschriibe.^[1] Er het d Verwaltig usbaut, d Opposizion vom Aadel bekämpft und die franzöösischi Wirtschaft gförderet und eso d Macht vo dr Chrone gsterkt. D Hoofkultur isch ganz uf d Person vom Herrscher zuegschnitte gsi. Dr Köönig het d Künst und d Wüsseschafte gförderet, und die franzöösischi Kultur het afo ufblüeje. Dr Louis XIV. het en expansivi und chriegerischi Ussepolitik gfüert, so dass Frankriich under sinere Regierig e Vormachtstellig in Öiropa ghaa het. Wäge sine Chrieg si d Staatsschulde vo Frankriich uf zwäi Milliarde Livres gwaggse, und s Land het bis 1725 brucht, bis es alli Schulde het chönne zruggzaale. Drotzdäm isch Frankriich, wo dr Louis gstorbe isch, s riichste Köönigriich in Öiropa gsi.

Dr Louis XIV. isch 72 Joor lang uf em Droon gsässe und isch äine vo de Monarche in dr Gschicht vo Öiropa gsi, wo am lengste gherrscht häi.

1. ↑ Lueg au: Manfred Kossok: Am Hofe Ludwigs XIV. S. 25, und Olivier Bernier: Ludwig XIV. Die Biographie. S. 110; für s daatsächlige Sälbstverständnis vom Louis XIV. in Bezug uf d Politik und s Staatswääse lueg: Klaus Malettke: Ludwig XIV. von Frankreich. Leben, Politik und Leistung. S. 67ff