Methodologie

D Methodologii (griechisch μεθοδολογία) isch d Leer vo de wüsseschaftlige Methode.

Si behandlet weli Methode für e bestimmti Art von ere Aawändig gäignet si und d Kriterie drfür, wiso mä e bestimmti Methode muess aawände oder wiso e Methode aagwändet wird und nit en anderi. Si kläärt Frooge zum Verständnis vom methodische Wääg.

D Methodologii isch also e Metawüsseschaft und e Däildisziplin vo dr Wüsseschaftstheorii. Im Geegesatz drzue bezäichnet Methodik s Wüsse vo de Methode, won e Braktiker oder e Wüsseschaftler het.

Uf Änglisch und Französisch macht mä dä Underschiid nit und vor allem s Änglische het en Iifluss druf, wie au im Dütsche sich d Gränze zwüsche de bäide Begriff verwüsche.

• Under Methodologii verstoot mä vilmol au ‚e Sammlig vo Methode‘, also e Methodebündel.
• Methodologii wird au im Sinn vo Methodik brucht, was äigetlig falsch isch. Äänligs bassiert mit em Begriff Technologii, wemm mä äigetlig ‚e Technik‘ mäint.