Phidias

Dr Fidias (altgriech. Φειδίας, Pheidias, * um 500 v. d. Z. z Athen; † um 432 v. d. Z. z Athen) isch en antike griechische Bildhauer und Toreut gsi. Sini bekanntiste Wärk si die 12 Meter hoochi Zeusstatue z Olympia, wo zu de Siibe Wältwunder vo dr Antike ghört het, und d Athena Parthenos z Athen.

Über s Lääbe vom Fidias, wo as dr grösst Bildhauer in dr Antike gältet, isch seer wenig bekannt. Er isch um 500 v. d. Z. z Athen uf d Wält cho, het en Usbildig gmacht bi de Bildhauer Hegias und Ageladas vo Argos, wo au Leerer vom Myron und vom Polyklet söll gsi si. Er het Bildhauerei in Stäi und Bronse gleert. [Spööter het er nöiji Verfaare entwigglet zum in sine Bildwärk die verschiidenste Materialie wie Marmor, Bronse, Glaasfluss, Gold und Elfebäi zum ene Ansambel chönne z veräinige. Dr Plutarch brichdet, ass dr Fidias as Fründ vom Perikles sich um d Arbäite uf dr Akropolis kümmeret het.