Philosophie der Antike

D Filosofii vo dr Antike isch en Epoche in dr Gschicht vo dr Filosofii. Si isch mee as 1100 Joor lang, vo öbbe 600 v. d. Z. (as dr eltist Verdräter isch dr Thales 624 v. d. Z. uf d Wält choo) bis ins Joor 529 n. d. Z., wo dr römisch Kaiser Justinian I. die Platonischi Akademii het lo duedoo. D Filosoofe häi vor allem z Griecheland und im Römische Riich gschafft.

D Filosofii vo dr Antike isch geografisch uf e Middelmeerrum beschränggt gsi. Anderi wichdigi filosofischi Dradizione im Altertum si die Chinesischi Filosofii (sit 1000 v. d. Z.) und die Indischi Filosofii (sit 1000 v. d. Z.). Iiflussriich si d Kultur vom Juudedum gsi, vom alte Egüpte, vom Perserriich und vo Mesopotamie. In Öiropa het d Filosofii vom Middelalter d Filosofii vo dr Antike abglööst.

Mä cha d Filosoofe vo dr Antike grob in verschiideni Grubbe iidäile. Die, wo vor em Sokrates gläbt häi, bezäichnet mä as Vorsokratiker (öbbe vo 600 bis 400 v. d. Z.). Si häi brobiert, s Wältbild, wo denn no vo Müüthe und Götter brägt gsi isch, mit Hilf vo dr Filosofii und dr Naturwüsseschaft z erklääre. Mit em Sokrates foot die Griechischi Klassik aa (öbbe 500 bis 300 v. d. Z.). Zu sällere Zit isch Athen s gäistige Zentrum vo Griecheland gsi, im Sokrates si Schüeler, dr Platon, und däm si Schüeler Aristoteles si zwäi vo de wichdigste Filosoofe, wo bis hüte Iifluss häi. Zur Klassik cha mä au d Sofiste, d Küniker mit iirem bekanntiste Verdräter, em Diogenes vo Sinope, d Epikureer, d Kyrenaiker und d Stoiker zelle. Noch dr Klassik si die hellenistischi Zit und denn d Spootantike, wo iiri äignige filosofische Schuele ghaa häi: die hellenistischi Stoa und dr Epikureismus und dr spootantiki Nöiplatonismus, wo s Dängge vo de Chilleväter beiiflusst het.