Schutzstaffel

D Schutzstaffle vo dr NSDAP (Abkürzt SS) isch am 4. April 1925 as Sonderorganisazioon vo der NSDAP zum persönlige Schutz vom Adolf Hitler gründet worde. Sit em Riichsparteidaag 1926 isch si dr Sturmabdäilig (SA) understande und het as parteiinterni „Polizei“ fungiert. Noch em sogenannte „Röhm-Putsch“ 1934, wo d SA entmachtet worde isch, isch d SS zun ere äigeständige Organisazioon vo dr NSDAP erhoobe worde. Si het im Dritte Riich s Polizeiwääse kontrolliert und paramilidäärischi Verbänd unabhängig vo dr Weermacht ufgstellt. Si isch vo 1934 aa für e Betriib vo de Konzentrazionslaager verantwortlig gsi. Es isch charakteristisch gsi für d SS, ass staatligi Funkzioone und Instituzioone mit Parteistrukture inenander verzaant gsi si. Zwüsche 1933 und 1945 isch d SS s wichdigste Terror- und Unterdrückigsorgan vom NS-Reschiim gsi. D SS isch maassgääblig gsi bi dr Blaanig und Usfüerig vom Holocaust und witere NS-Chriegsverbräche und isch noch 1945 as verbrächerischi Organisazioon verbote worde.