Syria

36.236.15Koordinate: 36° N, 36° O

Römischi Browinz Syria
D Browinz Syria im Röömische Riich
iigrichdet:	Syria 63 v. d. Z.
römisch sit:	63 v. d. Z.
het bestande bis:	135 n. d. Z.
Noochfolger:	Syria Palaestina
Verwaltigszentrum:	Damaskus bzw. Palmyra

Die röömischi Browinz Syria isch im Joor 63 v. d. Z. vom Fäldher Gnaeus Pompeius Magnus iigrichdet worde und isch bis zur Erooberig dur d Araber in de 630er Joor Däil vom Röömische Riich bzw. (sit 395) vom Oströömische Riich gsi. S hütige Süürie, wo nid s ganze Gebiet vo dr röömische Browinz umfasst, het si Naame vo iire übernoo.

Mäistens wird aagnoo, dr Naame Syria chiem vo Assyria; e baar Forscher glaube aber es gääb e Zämmehang mit dr Stadt Tyros – dr ersti Lut isch im iihäimische antike Dialäkt offebaar wie „ts“ usgsproche worde, eschönnt also si, dass „(T)Syria“ noch em Ort benennt worde isch, wo lang dr wichdigst in dr Regioon gsi isch.

Dr Herodes Archelaos, wo über Judäa, Samaria und Idumäa gherrscht het, isch im Joor 6 vom Augustus verbannt worde. Im Archelaos si Herschaftsgebiet isch denn e feste Däil vom Imperium worde und e röömische Brefekt het s verwaltet. In de Joor 34 und 37 isch au dr Räst vom Herodes sim Riich Däil vom Röömische Riich worde. Die Däil si in dr Zit vom Hadrian noch em groosse jüüdische Ufstand zur Browinz Syria Palaestina reorganisiert worde.

Dr mächdig Statthalter vo dr Browinz Syria het si Sitz z Antiochia am Orontes ghaa, wo äini vo de grösste und bedütendste Stedt im Imperium gsi. Drzue isch choo, ass starki Drubbeverbänd in dr Browinz stazioniert worde si, zum d Ostgränze gege d Parther z schütze. In dr früeje Zit vom Prinzipat si vier Legioone in dr Browinz stazioniert gsi.

D Browinz het under anderem Olivenööl, Wii, Zeedere­holz, purpur­gfärbti Stoff, Gleeser und elfenbein­verzierti Chläimööbel broduziert. Usserdäm isch d Browinz dr Ändpunkt für e Siide­handel über d Siidestrooss us em Kaiserriich China und für e Gewürz­handel us Indie gsi.

193/194 isch Syria in die bäide Browinze Syria Coele und Syria Phoenice iidäilt worde, und die si spööter in dr Spootantike in no chliineri Äihäite iidäilt worde. D Gebiet vo de süürische Browinze het bis in d Middi vom 6. Joorhundert e Blüetizit erläbt und isch näbe Egüpte äini vo de wichdigste Regioone vom Riich gsi, au wenn s sit em 3. Joorhundert immer wider emol zu Inwasioone vo de persische Sassaniide cho isch.

Im 7. Joorhundert si die süürische Browinze vo de islamisierte Araber erooberet worde.