Theresa May

D Theresa Mary May, wo am 1. Oktober 1956 uf d Wält cho isch, isch e britischi Politikeri.

Si isch d Dochter vom Hubert Brasier († 1981), Pfarrer vo dr anglikanische Church of England. Si het z Oxford Geografy studiert. 1997 isch si is änglische Unterhuus gwählt worde. Sid 2002 isch si Generalsekretärin vo de britische Konservatyve und sid 2010 Inneminischteri under em Premierminischter David Cameron gsi. Wo dä 2016 ufghört het, isch si ihm sini Nochfolgere als Premierminischtere worde.

Vor der Abstimmig über en Uustritt am 23. Juni 2016 isch si no drfür gsi, ass s Vereinigte Königrych i dr Europäische Union söll blybe.^[1] Wo dänn das Referändum doch e Meerheit für e Uustritt übercho het, isch si die worde, wo für d Verhandlige i de Länder vom Königrych und mit Europa wägem Brexit verantwortlech isch.

Dr Vertrag, wo si mit der Europäische Union usghandlet het, het im britische Parlamänt aber ekei Meerheit überchoo, und drum het d May am 24. Mai 2019 ihren Rücktritt as Füereri vo dr Konservative Partei uf de 7. Juni 2019 aagchündt.^[2][3] As Premierminischteri isch si bis im Juli 2019 im Amt blibe.^[4] Am 24. Juli 2019 het di änglischi Königin als iire Nochfolger der Boris Johnson ygsetzt.

1. ↑ Exclusive: what Theresa May really thinks about Brexit shown in leaked recording uf theguardian.com
2. ↑ Am Brexit gescheitert. (Memento vom 24. Mai 2019 im Internet Archive) Artikel vo dr Henriette Engbersen uf srf.ch vom 24. Mai 2019
3. ↑ Theresa May: Gefangen im Brexit-Hamsterrad (bzw. i dr Onlineversion: Theresa May und die fünf Fehlschläge ihrer Brexit-Politik). Artikel vom Markus M. Haefliger i dr Zürizytig vom 24. Juli 2019.
4. ↑ Theresa May wirft das Handtuch. Artikel uf nzz.ch vom 24. Mai 2019