Anabaptismo

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Los anabaptistas son una denominación cristiana protestant que amanixió en lo sieglo XVI mientres lo movimiento de la Reforma Protestant. Los anabaptistas compartiban la doctrina basica de lo protestantismo, pero se'n diferenciaban sobre tot en la doctrina de lo baptismo. Los anabaptistas creyeban que lo baptismo només se podeba fer en creyents adultos que ya teneban la capacidat d'entender lo significato suyo como representación de la muerte en lo pecato y la vida en Cristo. Por ixo consideroron que lo baptismo infantil no teneba valideza (lo nino no teneba la conoixencia de l'acto de lo baptismo ni heba preso la decisión de creyer en lo sacrificio de Cristo), y por ixo caleba que se baptizasen atra vegata.

Lo nombre anabaptista provién de lo griego anabaptizo, que en idioma aragonés quier dicir "atro baptismo dimpués". Pero este termin ye confuso porque suposaba la creyencia en un doble baptismo. En realidat pa lo anabaptistas i heba un unico baptismo, lo baptismo adulto, y no baptizaban a los ninos de los creyents que cuan ya yeran adultos.

S'ha d'aclarir que la doctrina de lo baptismo adulto ha estato comuna y cutiana en la historia de lo cristianismo, enantes y dimpués de la Reforma Protestant, y muitas denominacions protestants practican lo baptismo adulto. Lo que fa singular a los anabaptistas ye que estioron la primera familia protestant que proposó esta doctrina dimpués de la hechemonía doctrinal catolica de lo baptismo infantil.