Cine estausunidense

O cine estausunidense ye aquel que globalment ha modelau mas profundament o cine en o transcurso d'o suyo primer sieglo d'existencia, tanto por os contenius y as tecnicas que ha desembolicau como por l'aspecto economico y cultural. O suyo corazón se troba situau en Hollywood, un barrio d'a ciudat estausunidense de Los Angeles a on se producen a mayor parti d'os programas audiovisuals d'o país, incluyius los televisivos.

A critica estausunidense Pauline Kael resumió en 1968 o estilo d'as cintas hollywoodienses con una formula que se'n ha feito famosa: Kiss Kiss Bang Bang. Por lapidaria y breu que siga, a formula traduz a importancia de l'acción que caracteriza ista producción, metendo en un epigrafe a importancia d'o dominio tecnico que ha caracterizau iste cine: o guión, a escenificación, as imáchens, o montache, a musica, o soniu y os efectos especials.

Manimenos o cine estausunidense ye igualment una industria poderosa y muit estructurada, en a que o financiamiento y o marketing son en os primers rangos d'os criterios de decisión. O sector d'a diversión audiovisual ye en primer puesto d'os ingresos d'a economía d'os Estaus Unius en l'exterior. As cintas producidas en os Estaus Unius son, por eixemplo en Europa, as que suposan a mayor parti d'as dentradas en salas (62,5% d'as dentradas en 2001). O cine de Hollywood ye considerau como o primer vector de difusión d'a cultura estausunidense en l'exterior (chunto con as series de televisión).

O cine d'os Estaus Unius ha teniu un fundo efecto sobre o cine de tot o mundo dende primerías d'o sieglo XX. A suya historia ye a vegadas deseparada en cuatre grans periodos: a era d'o cine mudo, o cine clasico de Hollywood, o nuevo Hollywood y a epoca contemporania (dimpués de 1980). Dende la decada de 1920, a industria cinematografica estausunidense ha replegau mas diners cada anyo que la de cualsiquier atro país.