Back لمن تقرع له الأجراس (فيلم) Arabic لمن تقرع له الاجراس ARZ کیم زنگ چالیر (فیلم، ۱۹۴۳) AZB За кого бие камбаната (филм) Bulgarian For Whom the Bell Tolls (pel·lícula) Catalan Камшăн чан çапаççĕ (фильм) CV For Whom the Bell Tolls (ffilm 1942) Welsh Wem die Stunde schlägt (Film) German Για Ποιον Χτυπά η Καμπάνα (ταινία) Greek For Whom the Bell Tolls (film) English
- Iste articlo ye sobre una cinta estausunidense de cine belico epico de l'anyo 1943; ta atros usos, se veiga For Whom the Bell Tolls.
For Whom the Bell Tolls (títol orichinal en anglés, en aragonés Por qui tanyen as campanas, enguerada en Aragón con o suyo títol traduciu enta lo castellano de Por quién doblan las campanas) ye una cinta de cine estausunidense de cine de drama epico belico enguerada l'anyo 1943, dirichida por Sam Wood seguntes un guión adaptau por Dudley Nichols (basau en a novela For Whom the Bell Tolls que heba publicau Ernest Hemingway en l'anyo 1940), con una banda sonora orichinal de Victor Young, una dirección de fotografía de Ray Rennahan y una producción cinematografica de Sam Wood ta la productora cinematografica Paramount Pictures. L'elenco d'actors d'a cinta ye formau, en os suyos papels principals, por Gary Cooper, Ingrid Bergman, Akim Tamiroff, Arturo de Córdova, Vladimir Sokoloff, Mikhail Rasumny, Fortunio Bonanova, Eric Feldary, Victor Varconi, Joseph Calleia, Lilo Yarson, Katina Paxinou, Alexander Granach, Adia Kuznetzoff, Leonid Snegoff, Leo Bulgakov, Duncan Renaldo, Frank Puglia, Pedro de Cordoba, Michael Visaroff, Martin Garralaga, Jean Del Val y John Mylong.
Robert Jordan ye un mayestro estausunidense que partecipa en a Guerra Civil Espanyola como miembro d'as Brigadas Internacionals contra los sublevaus mandaus por Francisco Franco, y conoix prou bien a mentalidat espanyola en haber viviu en Espanya antes d'a guerra. Por ixo y por a suya condición d'experto en explosivos, l'Alto Mando de l'Exercito Popular Republicano lo ninvía en a redezaga d'as tropas franquistas ta que, con a colaboración d'un grupo de guerrillers, destruya un puent estratechico que servirá ta que los franquistas fagan plegar en o frent refuerces ta frenar l'abance d'una imminent ofensiva republicana. Robert contacta con Anselmo, qui a la vegada lo conduz enta lo grupo de guerrilleros, mandaus por Pablo. Bien luego, Robert s'enamora de María, una choven que fa parte d'o grupo, y que ye marcada mentalment por l'asasinato de su pai (alcalde d'o suyo lugar) y de su mai y por a suya propia violación por part d'un grupo de falanchistas. A la vegada, Robert topa on Pablo, lo líder d'o grupo, que considera que si colaboran en a destrucción d'o puent se trobarán en periglo en atrayer l'atención d'as tropas franquistas. Pero Jordan recibe lo refirme de Pilar, a parella de Pablo, qui se converte en a verdadera líder d'o grupo en apartando a Pablo y se coloca a las órdens de Jordan, y qui amás ixalenta la relación entre Jordan y María. Tanimientres, as tropas franquistas consiguen destruyir a un atro grupo guerrillero amán d'o grupo de Jordan, y amás parixen conoixer la imminent ofensiva republicana y han acumulau tropas ta repeler l'ataque encara que Jordan consiga destruyir o puent.
A cinta s'ambienta en Espanya en bel momento entre 1936 y 1939 mientres a Guerra Civil Espanyola, y las suyas escenas se filmoron en bels puestos de California (incluyindo-ie Sacramento y lo paso de Sonora) y en Nevada, amás d'en os Paramount Studios en Los Angeles, tamién en California.[2]
For Whom the Bell Tolls ha recibiu cuantos premios y nominacions, en destacando un Premio Oscar a la Millor Actriz Segundaria y atras ueito nominacions (Millor Cinta, Millor Actor, Millor Actriz, Millor Actor Segundario, Millor Fotografía en Color, Millor Disenyo de Producción, Millor Montache y Millor Banda Sonora Orichinal) en a suya 16ena edición, y dos Premios Globos d'Oro (Millor Actriz Segundaria y Millor Actor Segundario) en a suya 1era edición.