Himnu

Un Himnu ye, acordies col diccionariu de l'ALLA, una composición poética o musical n’allabancia de daqué o a daquién, o, tamién, una composición musical que simboliza un país o una comunidá.

La pallabra deriva del términu griegu ὕμνος (hymnos), que significa canciu d'allabancia, y fai referencia a una poesía, un canciu o un testu narrativu qu'espresen, davezu, sentimientos positivos, d'allegría y celebración. A lo primero yeren composiciones corales, y dempués pasaron a ser ún de los xéneros de la poesía llatina na Edá Media.

Un himnu puede tar dedicáu a un dios, un santu, un héroe o una persona nomada; o tamién puede componese pa celebrar una victoria o dalgún socesu dignu d'alcordanza. Y tamién puede ser una composición musical qu'identifica una comunidá, una rexón, un pueblu o una nación, y que xune emocionalmente a los que la sienten o canten. Estos caberos son, les más de les veces, marches -que celebren victorias d'esa comunidá- o poesíes llíriques.