Historia del arte

La historia del arte ye la evolución del arte al traviés del tiempu.

Entendíu como cualquier actividá o productu realizáu pol ser humanu con finalidá estética o comunicativa, al traviés del qu'espresa idees, emociones o, polo xeneral, una visión del mundu, l'arte emplega diversos recursos, como los plásticos, llingüísticos, sonoros o mistos.

La historiografía del arte, como disciplina académica y redolada institucional (museos, mercáu del arte, departamento universitarios, producciones editoriales) suelse acutar a les denominaes artes visuales o plástiques (esencialmente a pintura, escultura y arquiteutura), ente qu'otres artes son más específicamente oxetu d'estudiu d'otres disciplines claramente delimitadas, como la historia de la lliteratura o la historia de la música, siendo toes elles oxetu d'atención pola denomada historia de la cultura o historia cultural, xunto coles hestories sectoriales enfocaes a otres manifestaciones del pensamientu, como la historia de la ciencia, la historia de la filosofía o la historia de les relixones. Dellos campos de conocencia estrechamente rellacionaos cola historia del arte son la estética y la teoría del arte.

A lo llargo del tiempu l'arte clasificóse de bien diversa manera, dende la distinción medieval ente artes lliberales y artes vulgares (o «mecániques»), pasando pola moderna distinción ente belles artes y artes menores o aplicaes, hasta la multiplicidá contemporánea, qu'entiende como arte casi cualquier manifestación de la creatividá del ser humanu.

La socesiva ampliación del llistáu de les «artes principales» llegó nel sieglu XX hasta'l númberu de nueve: l'arquiteutura, la danza, la escultura, la música, la pintura, la poesía —entendida de forma amplia como lliteratura con intención estética, qu'inclúi los distintos xéneros del teatru y la narrativa—, la cinematografía, la fotografía y la historieta (o cómic).

Al solapamiento conceptual de términos ente artes plástiques y artes visuales añadiéronse los de diseñu y artes gráfiques. Amás de perantigues formes d'espresión artística como la moda y la gastronomía, anguaño suélense considerar artes nuevos vehículos espresivos como la publicidá, l'animación, la televisión y los videoxuegos.

La historiografía del arte ye una ciencia multidisciplinar, procurando un exame oxetivu del arte al traviés de la historia, clasificando cultures, estableciendo periodizaciones y reparando les sos carauterístiques distintives ya influencies. L'estudiu de la historia del Arte desenvolvióse primeramente nel Renacimientu, col so oxetu llindáu a la producción artística de la civilización occidental. Sicasí, col tiempu impúnxose una visión más amplia de la historia artística, intentando una descripción global del arte de toles civilizaciones y l'analís de les sos producciones artístiques en términos de los sos propios valores culturales (relativismu cultural), y non yá de los de la historia del arte occidental.

L'arte gocia güei día d'una amplia rede d'estudiu, espardimientu y caltenimientu de tol legáu artísticu producíu pola humanidá a lo llargo de la so historia. Mientres el sieglu XX abondaron les instituciones, fundaciones, museos y galeríes, d'ámbitu públicu y priváu, dedicaos al analís y catalogación de les obres d'arte, según la so esposición a un públicu mayoritariu. La puxanza de los medios de comunicación foi fundamental pal meyor estudiu y divulgación del arte.

Eventos y esposiciones internacionales, como les bienales de Venecia y São Paulo o la Documenta de Kassel ayudaron al fomentu de nuevos estilos y enclinos. Premios como'l Turner de la Tate Gallery, el Premiu de la Fundación Wolf de les Artes, la Medaya Picasso de la UNESCO, el Premiu Velázquez d'Artes Plástiques, el Premiu Pritzker d'arquiteutura, el Premiu Nobel de Lliteratura, la Medaya Mozart de la Unesco de música clásica, el Pulitzer de fotografía y los Óscar de cine tamién fomenten la obra de los meyores creadores a nivel internacional. Instituciones como la UNESCO col establecimientu d'un Patrimoniu de la Humanidá ayuden igualmente al caltenimientu de los principales monumentos del planeta.^[1]

1. ↑ Onians (2008), páxs. 316-317.