LGBT

LGBT o GLBT son les sigles que designen colectivamente a les lesbianes, los gais, los bisexuales y les persones tresxéneru. N'usu dende los años 90, el términu «LGBT» ye un allongamientu de les sigles «LGB», que de la mesma reemplazaren a la espresión «comunidá gai» que munchos homosexuales, bisexuales y transexuales sentíen que nun-yos representaba afechiscamente.

El so usu modernu intenta enfatizar la diversidá de les cultures basaes na sexualidá y la identidá de xéneru, y puese aplicar para referise a daquién que nun ye heterosexual, en llugar d'aplicalo puramente a persones que se definen como homosexuales, bisexuales o tresxéneru. Pa dar cuenta d'esta inclusión, una variante popular inclúi la lletra Q de queer (ex, “LGBTQ”) p'aquellos que nun tean específicamente representaos por LGBT, como los pansexuales, intersexuales, etc.

Les sigles estableciéronse como una forma d'auto-identificación y fueron adoptaes pola mayoría de comunidaes y medios de comunicación LGBT en munchos países de fala inglesa. Sicasí, nun son del gustu de toos a los que lliteralmente engloba. Per un sitiu, dalgunos intersexuales quieren ser incluyíos nel grupu LGBT y preferiríen el términu «LGBTI». Por otru, ciertos individuos d'un grupu pueden sentir que nun tienen nenguna rellación colos individuos de los otros grupos englobados y atopar ofensives les persistentes comparances. Dalgunos defenden que les causes tresxéneru y transexuales nun son les mesmes que les de los homosexuales y bisexuales. Esto atopa la so espresión na corriente del «separatismo gai y lésbicu», que caltién que les lesbianes y los gais tendríen de formar una comunidá distintiva y dixebrase de los otros grupos que de normal s'inclúin. Otres persones tampoco ven con bonos güeyos el términu y creen que les lletres son demasiao políticamente correutes, un intentu de categorizar diversos grupos de persones nuna zona gris, qu'implica que les esmoliciones y prioridaes de los grupos principales representaos reciban la mesma consideranza.