Boschberg

Da Boschberg (oda Poschberg) is a Geg'nd im 10.  Weana Beziak Favoritn (Beziaksteu Inzersdorf-Stadt), zwisch'n da Troststråß'n im Norden, in Erholungsgebiet Wienerberg im Westen, in Vateulakraas und da Südost-Tangent'n im Osten und im Süden de Siedlung Wienerfeld im Reifental. De Grenz'n san olladings nua'r ois ungefäah zum sehg'n. Genau g'numma is da Boschberg da Vabindungs-Sått'l zwisch'n in Wienerberg und in Laaer Berg, oiso eigentli net wiakli söwa'r a richticha Beag. Ea is a Teu von da Terrassenlaundschåft aum Weana Beck'nraund.

Im 19. Joahrhundat woa duat'n a ausdehnte locka mit Gebüsch bewåchsane Geg'nd (drum da Nauman Boschberg = Buschberg), wo'r a gewisse Frau Hawlař seit 1865 an Weixl-Goat'n b'sess'n håt. Duat'n san Weixlbaam und -busch'n zog'n wua'n, de wås ma daumois und aa no späda fia de Produkteaun von Spaziasteck'n und Weixl-Pfeif'nkepf oda Zigarett'nspitz (de „Weixlspitz“ mit da bekaunnt'n schwoazz'n Braundmark'n) vawend't håt.

Da Frau Hawlař iah'n Weixlgoat'n gibt's zwoa scho laung nimma, owa'r a Klaagoat'nsiedlung trågt no heitz'tågs den Nauman „Weichselgarten“ – glei daneb'n liag'n de Siedlungan „Boschberg“ und „Reifental“.

Auf'n Boschberg gibt's in Jean-Jaurès-Hof in da Raxstråß'n, de Schleierbarack'n aum Favoritna Gewerbering, a Garasch von de Weana-Linien-Autobus in da Raxstråß'n, a Rettungsstateaun von da Weana Berufsrettung in da Grenzackergåss'n und etliche Spuatplätz'. Im 19. Joahrhundat sa duat'n de Miren von da Weana Uneveasitäts-Sternwart'n g'staund'n.

• 
  Jean-Jaures-Hof
• 
  Autobusgarasch'
• 
  Schleierbarack'n
• 
  Klaagäat'n

Heitz'tågs is oft net amoi denan g'staundanan Fravoritna da Boschberg a Begriff, waunn's net gråd an Klaagoat'n drob'n hau'm.