Noadsee

De Noadsee (dt.: Nordsee) is a Meea, des wos im Noadn vo Deitschland liegt, wia da Nama eh aa scho sogt. Se fongt im Westn vo Schleswig-Holstein, am Bundesland vo Deitschland, des wo am weidasdn drobn liegt und glangt nachad, wem ma no Westn schaugd bis no England umma. Nem de offnsichtlichn Grenzn duach de Gstodn vo de Onrainastootn werd de Noadsee duach a denkte Linie vom norwegischn Lindesnes hi zum dänischn Hanstholm in Richtung Skagerrak obgrenzt. De neadliche Grenz zum Atlantik is natuaraimli weniga eihdeitig. Traditionej werd a denkte Linie vo NoadSchottland iwa de Shetlands bis hi zum norwegischn Ålesund ogenumma; noch'm Oslo-Pariss-Obkumma vo 1962 valafft se etwos weita westli und neadli entlong vo 5° westlicha Läng und 62° neadlicha Broatn af Häh vom norwegischn Geirangerfjord. Im Sidn is as Festland de Grenz. Foigande Lända grenzn an'd Noadsee o (im Uahzoagasinn): Norwegn, Dänemark, Deitschland, Holland, Bejgien, a gonz a kloa weng Frankreich, und donn no England und Schottland.

D'Noadsee is a Meea, des wos a fia'n Fremdnvakeah gnutzt werd, bsondas an de Gstodn, de wos zu Bejgien, Holland, Deitschland und Dänemark dazuaghean. A Grund dafia is wia bei da Ostsee de guade Meealuft, de do bsondas guad sei soi und bsondas ned so gsundn Menschn hejfa soi.