Schwaakroft

De Schwaakroft oda Gravitation (vo lateinisch : gravitas fia „Schwaa“)^[1] is a Natuakroft de wo bewiakt, dass oiss wos a Massn hod, si gegnseiti oziagt.

Je weida de Massn vonananda entfeant san, desto gringa wead de Wiakung vo da Gravitation. Se wead oba nia Nui, hod oiso a unbegrenzte Reichweitn. A wichtigs Meakmoi vo da Schwaakroft is, dass mas net obschiama ko, se wiakt imma und ibaroi (im Untaschied za da Elekritzitet und zan Magnetismus beispuisweis).

In da klassischn Physik wead de Schwaakroft midn Gravitationsgsez vom Newton bschriebn, d. h. ois a Oart Feanwiakkroft de wo duachn laan Raum wiakt. Ganz andas und am genauastn vo oin Theorien wead de Gravitation vo da oigmoanan Relativitetstheorie dakleat (Albert Einstein in 1915). Se bschreibt de Gravitation neama ois Kroft sundan ois Konsequenz vo da Vabiagung vo da viademensionain Raumzeid. De Vabiagung entsteht wiedarum duach de ungleiche Vateilung vo Massn bzw. Energie im Universum und se bewiakt sogor a Vaendarung vo da Zeid. Wann de Gravitation stoark is, nacha vageht de Zeit langsama.

Auf der Eadn bewiakt de Schwaakroft, dass olle Keapa obefoin, wanns ned vo ana andan Kroft ghindad wean. Im Sunnasystem bstimmt de Gravitation de Bohna vo de Planetn, Mondn, Satellitn und Kometn. Driba ausse oba aa vo Stean, vo schwoarzn Lechan, vo Galaxien, Galaxienhaufa und so weida.

1. ↑ PONS Deutsch - Latein, Erstbedeutungen von gravitas