An Ramadan (/ˌræməˈdɑːn/; Arabic: رمضان Ramaḍān, IPA: [ramaˈdˤaːn];[note 1] na inaapod man na Ramazan, Ramadhan, o Ramathan) iyo an ika-siyam na bulan sa kalendaryong Islamiko, asin ta ini kinukumplihan kan mga Muslim sa bilog na kinaban nin pag'ayuno sa pagromdom kan enot na paghayag kan Koran ki Muhammad susog sa Islamikong pagtubod. An taon-taon na pag'obserbar iyo an saro sa Limang Harigi kan Islam. An bulan na'ayaw nin 29-30ng aldaw batay sa biswal na pagsirip kan paglubog nin bulan, ini susog sa mga osipon na tinipon sa hadith.[1][2]
An tataramon na Ramadan gikan sa Arabeng kataga' na 'ramida' o 'ar-ramad', na boot sabihon maragit na init o agil na agil. An pag'ayuno sinasabing fardth (obligatoryo) para sa mga mayor na edad nang Muslim, maliban na sana sa mga nagheherelang, nagbabyahe, mga gurang na, mga bados, nagpapasuso, may diabetes, laygay na helangon, o nagreregla. Nagpoon asin nagin obligagoryo an pag'ayuno sa bulan nin Ramadan(wājib) durante kan bulan nin Sha'ban, sa ikaduwang taon pakahubo' kan mga Muslim haleng Medina pasiring Mecca. Mga fatwa (pagboot) pinaluwas na nagsasabi na an mga Muslim na yaon sa mga lugar na natural nangyayari an matangang saldang o bangging polar dapat magkuyog sa oras kan Mecca, alagad an mas inaakong praktis iyo na an mga Muslim yaon sa siring na lugar magsunod na lang sa oras kan pinakaharaning nasyon kun saen an banggi mabibisto sa aldaw o liwanag.[3][4][5]
Mantang an Muslim nag'aayuno poon umagahon abot sinarom, an Muslim dapat maglehe sa pagkakan solidong pagkakan, paginom tubig o mga likido, pagsigarilyo, o makidurog. An mga Muslim man pigsonsonan na magrayo sa mga makasa'lan na gawe na ikakapara' mansana kan maray na balos hale sa pag'ayuno, arog siring sa malanit na pagtaram (panginginsulto, panlilibak, pagraway, pagputik, aibp.) asin maki-iwal maliban kun sa sadiring pagdepensa. An pagkakan sinisirbe bago mag'umagahon (Suhoor) asin pakasinarom (Iftar). Sinasabi man na an espiritwal na balos (thawab) para sa pag'ayuno mas dakul sa laog kan bulan nin Ramadan. Para sa Muslim, an Ramadan oportunidad na magdulot nin mas halawig asin mas hararom na pagpamibi, pagbasa kan Koran, asin tuyong paggibo nin gibong-herak asin marhay na gawe.[6][7]