Tubig

An tubig sarong nasisilag na fluido na iyo an napano asin naporma kan mga salog, danaw, dagat asin uran asin ini an saro sa mayor na sustansya nakukua sa gabos na bagay na may buhay, tinanom man o hayop. Bilang sarong kemikal na pagraramas, an sarong tubig na molekulo linalaman nin sarong oksiheno asin duwang hidrogeno. An tubig, likido kun nakaag sa estandarteng temperatura asin presyon alagad dungan na naeksiste ini sa Kinaban sa iba-iba niyang kamugtakan o estado komo yelo o komo sarong alintoto. Yaon man ini sa estado bilang snow, alopoop, ambon, o panganuron.

An tubig napatos 71% kan ibabaw nin Kinaban^[1]. Mahalaga nanggad ini sa gabos na porma nin pagkabuhay. Sa Kinaban, sinasabing 96.5% kan tubig kan planetang ini an yaon sa mga dagat, 1.7% sa irarom daga, 1.7% sa mga glaciers asin taklob yelo kan Antarctica asin Greenland, dikit na porsyon sa ibang darakulang hawak katubigan, asin 0.0001% sa ayre bilang alintoto, panganoron (na binibilog ni yelo asin likidong tubig suspendido sa ayre), asin mga pagtete. Sinasabing 2.5% daa kan tubig sa KInaban an tubig-tabang, asin 98.8% kan tubig na iyan sa pormang yelo (dai kabilang an yelo sa panganoron) asin sa irarom-daga na tubig. Kulang sa 0.3% kan gabos na tubig-tabang an yaon sa mga salog, danaw, asin sa atmospero, asin mas dikit ngane kan tubig-tabang nin Kinaban (0.003%) an nalalaom sa mga hawak biolohiko asin sa mga produktong ginigiribo.^[2]

1. ↑ https://www.cia.gov/library/publications/the-world-factbook/geos/xx.html#Geo Archived 2010-01-05 at the Wayback Machine. Kinua 27-05-15
2. ↑ https://global.oup.com/academic/product/water-in-crisis-9780195076288?cc=ph&lang=en& Kinua 27-05-15