Joko Widodo

Ir. H. Joko Widodo (hurup Arab Gundul: جاك ويداد‎) atawa Jokowi (hurup Arab Gundul جاكوى‎) atawa nama bocahnya Mulyono^[1] (hurup Arab Gundul: مليان‎), berojol tanggal 21 Juni 1961, entu tukang pulitik, tukang dagang, èn mantan persidèn Indonésia semprakan tanggal 20 Oktober 2014 ampé 20 Oktober 2024. Pa' Jokowi gantiin persidèn sebelonnya, ya'entu Susilo Bambang Yudhoyono^[2] èn digantiin persidèn berikutnya, ya'entu Prabowo Subianto. Sebelonnya, pa' Jokowi ngelakonin tugas jadi Gubernur Jakarta semprakan tanggal 12 Oktober 2012 ampé tanggal 16 Oktober 2014. Pa' Jokowi lanjutin gawé jadi gubernur, ngegantiin gubernur sebelonnya, nya'entu Fauzi Bowo. Pas lagi gawé jadi gubernur, pa' Jokowi ditemenin ama wakilnya nyang namanya Basuki Tjahaja Purnama mantan Bupati Belitung Wètan. Pa' Jokowi kepili pas pemilihan gubernur taon 2012 èn didukung ama Parté Démokrasi Indonésia Perjuangan èn Parté Gerakan Indonésia Raya. Sebelon jadi gubernur Jakarta, dia ngelakonin jawatan sebagé walikota Surakarta sederi tanggal 28 Juli 2005 ampé tanggal 1 Oktober 2012. Pa' Jokowi asin ngegiles gacoan Fauzi Bowo ama Nachrowi Ramli nyang dicalonin ama Parté Démokrat.

1. ↑ Kisah Mulyono bin Notomihardjo. Jokowi Kecil Mengapa Ganti Nama? dari situs Tirto
2. ↑ "Jokowi dilantik hari ini sebagai presiden Indonesia". BBC. 20 Oktober 2014. Diakses tanggal 30 Maret 2017.