Nilu

U Nilu (in arabu نهر النيل Nahr à u-Nīl, in spagnolu Nilu, in inglesu Nile, in francesu Nil) hè un fiumu Africanu longu 6 671 km. Tradiziunalamenti cunsidaratu u fiumu più longu di u mondu, cumpeti u primatu di a lunghezza cù u Riu di l'Amazoni.^[1]

U Nilu pussedi dui grandi affluenti, u Nilu Biancu è u Nilu Turchinu; quist'ultimu cuntribuisci incù un maiò apportu di acqua è di limu fertili, ma u prima hè u più longu. U Nilu Biancu nasci in a rigioni di i Grandi Lava di l'Africa cintrali, incù i fonti chì si spinghjini finu à u Ruanda, scorri dopu versu u nordu è traversa a Tanzania, u Lavu Vittoria, l'Uganda è u Sudan miridiunali. U Nilu Turchinu inveci hà i so fonti in u Lavu Tana in Etiupia, è scorri à traversu u Sudan sudu-uriintali. I dui fiuma si scontrani è si fondini vicinu à a capitali sudanesa Khartoum.

A sizzioni sittintriunali di u fiumu scorri guasi intiriamenti à traversu u disertu di u Sahara, da u Sudan à l'Egittu, un paesi di u quali a civiltà hè dipesa da u fiumu finu da i tempi antichi è più rimoti. A maiò parti di a pupulazioni egiziana è tutti i so cità (incù l'eccizzioni di quiddi situati longu a costa) si trovani longu a vaddi di u Nilu à u nordu di Assuan, è guasi tutti i siti storichi è culturali di l'Anticu Egittu si trovani longu i spondi di u fiumu.

À a fini u Nilu si sparghji in un grandi delta è sfocia in u Mari Tarraniu.

Da i surghjenti à u delta u Nilu traversa setti paesi africani: Burundi, Ruanda, Tanzania, Uganda, Sudan di u Sudu, Sudan è Egittu, ma u so bacinu idrugraficu includi purzioni di a Ripublica Dimucratica di u Congu, Kenia, Etiupia è Eritrea.

1. ↑ Cita u Nilu com'è u fiumu più longu di u mondu, par asempiu, l'anciclupidia on line di De Agostini (sapè.it); eppuri a quistioni hè contruversa in quantu currilata à quidda di l'effittiva lunghezza di u Riu di l'Amazoni, sicondu ch'eddu si cunsidareghja o menu a zona di l'isula di Marajó.